13.-21.10.2006: Pirmin war hier!

So, hüt hani im Pirmin sini Föteli übercho. De chani o ändlech chli vo dere Wuche verzelle, woner mir hie äs Bsüechli abgstattet het: Mir si di erschte drü Täg, woner isch hie xi grad mal us Trondheim use u wider i Richtig Tydal. Vo dert simer zu der Stabburetkoia gwanderet (bi die Hütte ja ä Wuche vorhär scho ga aluege). Vo dert simer de am nächschte Tag querfeldein zu der Hognabukoia glüffe. Die Hütte heimer mit drü Norweger teilt. Die si aber ersch bi Dunkelheit uftoucht. Sie si o scho äs paar Tag underwägs xi. Am Mänig si mer de wider nach Tydal gwandert u mitem Bus heigfahre. So, u iz chöme d Bilder :-)

Hognabukoia

Der Räscht vo der Wuche ha i rächt vil für d Uni u mi Job nächscht Semeschter müesse schaffe. Der Pirmin hets sech de i der Unibibliothek igrichtet u a sinere Seminararbeit gschribe und für mi äs super Poster für üsi Projekt-Usstellig gstaltet:

Zums genauer aluege: Drufklicke

Am Namittag-Abe simer de albe no chli id Stadt. A eim Abe simer no bi der Mari (mi Buddy) u ihrem Fründ zumene Norwegische Znacht (norsk middag) iglade xi. Äs isch sehr fein xi und het kei Fisch gäh :-)
Am Mittwuch simer ines tolls Restaurant fein ga ässe. Dä Abe heimer vo de Eltere vom Pirmin gsponseret übercho. Hie nomal : Merci vilmal Inge u Toni!
Am Donnschtig Abe simer no a Match vom "Trondheim Ishockey Klubb (TIK)". Der Match isch nid so toll xi; immerhin hets vil Goal gäh. Trondheim het 4:5 verlore. Der Pirmin het sech ständig ufgregt, dass si d Checks nid fertiggfahre. Im Schwizer Hockey geits scho chli anders zu u här. Aber äbe, das isch halt Norwege. Di würklech guete Spiler si wahrschlinlech alli in Schwede, Finnland, oder ir NHL.
Tja u am Samschtig simer de am 04.00h am Morge zum Bus id Stadt abegfahre. Der Pirmin isch wider abgreist u i bi nomal ga schlafe... :-)

PS: Ich habe gerade etwas spät bemerkt, dass ich Schweizerdeutsch geschrieben habe. Ich entschuldige mich dafür bei den Lesern aus Deutschland und Österreich!